FAQ · 18 條
問得最多嘅問題，
照直答。
包括「$200 包咩」、「檢查完唔幫襯得唔得」、「免拉線係咪一定得」呢類唔好意思問嘅問題。答唔到嘅，直接 WhatsApp 問。
01收費
關於收費
$200 檢查費包啲咩？
包上門、30–45 分鐘檢測、即場口頭解釋結果。檢測包括：各房間 WiFi 訊號強度、上下載速度、ping 同 jitter、附近同頻網絡干擾掃描、Router 基本設定檢查。唔包施工、唔包材料。如果想我地出一頁書面報告，可以加 $200。
檢查完一定要幫襯你地施工嗎？
唔需要。檢查費就係檢查費，你可以攞住個結果自己搞、去買機、或者搵第二間。我地唔會扣起資料，亦唔會逼你即刻決定。講真，有啲個案我地會直接同你講「你唔使俾錢，搬個 router 就得」。
會唔會上到嚟先加價？
唔會。檢查完我地會講清楚：做咩、幾錢、做幾耐、材料另計幾多。你同意先開工。施工中途如果發現新問題（例如牆內喉管塞咗），我地會停手再同你講，唔會自己做決定。
02器材
關於器材
要唔要我事先買 Router 或者 Mesh？
唔使。檢查當日我地會帶後備器材上門測試，證明「換機係咪真係有用」。如果只需要調整設定同擺位，你一部機都唔使買。如果真係要換，我地會講清楚需要幾多部、放邊、大約幾錢，你自己去買又得，我地代購又得（代購唔另收手續費，單據照畀你）。
你地會唔會硬銷 Router？
唔會，因為我地唔靠賣機賺錢。上門費同施工費係我地收入。你部機仲跑得動，我地會叫你留住；你部機真係唔夠力，我地會解釋邊個規格唔夠（例如只支援 Wi-Fi 5、LAN 得 100M、RAM 太細），而唔係一句「舊咗要換」。
03預約
關於預約同時間
由預約到上門要等幾耐？
一般 1–3 日內。晚上同星期日嘅時段比較滿，建議早兩日約。急嘅（例如今日完全上唔到網）可以 WhatsApp 講聲，我地盡量攝時間。
真係可以約收工時間？
可以。19:00–22:00 係我地主要時段之一，因為大部分客人日頭要返工。呢個時段加 $100 起（交通同加班成本），價錢會事先講明。
上門要幾耐？我要唔要請假？
檢查 30–45 分鐘。如果即場做設定優化，大約 1 小時。如果要裝 Mesh 或拉線，2–4 小時，會事先報時間。你唔使請全日假，約一個時段就得。
04樓型
關於樓型同地區
村屋三層做唔做？
做，而且係我地最多嘅個案之一。村屋難處係跨層同外牆，通常用「有線回程 + 每層一個 AP」最穩；如果真係拉唔到線，會用無線回程 Mesh，但會事先同你講速度會打幾多折。價錢按層數同拉線距離報。
離島做唔做？
做，但另議。船期同交通時間要計入去，通常會安排半日或全日。長洲、坪洲、南丫島、愉景灣都去過。
我住劏房／套房，得唔得？
得。劏房常見問題係「全層共用一條寬頻、分機太多、Router 擺喺走廊」，呢啲唔需要鑽牆都處理到。如果房東唔准改動，我地會用免拉線方案，唔會搞到你要賠錢。
05技術
關於技術同判斷
免拉線係咪一定得？
唔係，我地唔會咁講。免拉線（無線回程）嘅代價係速度同延遲：每跳一層通常打七至八折，牆多、金屬門、鏡面會再差。如果單位大、牆厚、要打機，拉一條線往往更平更好。檢查當日我會實測兩者差距，由你揀。
打機疾機，一定係 WiFi 問題？
唔一定。常見原因有四類：WiFi 訊號／干擾、Router 處理唔切（NAT、QoS）、寬頻本身（尤其晚上高峰）、遊戲伺服器距離。檢查會逐項分開測，例如用有線對比 WiFi、用 ping 同 traceroute 睇邊一跳出事。分唔清就換機，通常白花錢。
我唔識講技術名詞，點算？
唔緊要，你只需要講「邊間房收唔到」、「幾點最慢」、「打機幾時疾」。我地上門會用圖同你解釋，唔會拋術語。
06售後
關於保養同付款
做完有冇保養？
施工同設定有 30 日保養：同一問題再出現，免費返嚟跟一次。器材保養跟代理商，我地可以幫你交收但要收車馬費。人為改動（例如你自己 reset 咗 router）唔算保養範圍。
付款方式？
完成後付：現金、FPS 轉數快、PayMe。檢查費可以即場俾。唔收信用卡（避免手續費轉嫁客人）。
可以只做檢查，我自己動手嗎？
可以，而且我地好歡迎。檢查完我會寫低你需要改嘅設定同建議擺位，你影低就得。有啲客人之後自己買機返嚟再叫我地上門設定，都係照 $300 起。
07私隱
關於私隱
你地會唔會拍我屋企或者攞我資料？
我地只會影訊號讀數同 router 設定畫面（唔會影到你屋企環境），用嚟做報告。唔會公開你地址、電話、WiFi 密碼。詳情見私隱政策。
仲有問題？直接問
唔使客氣，問價同問技術都歡迎。我地寧願你問清楚先決定，好過上到嚟大家尷尬。
檢查費 $200 起 · 明碼實價 · 收工時間可約